TURA: Sukrobar pringo, South West Garo Hills a·ja gita ro·ong salangenggipa truck gari bolsa, Ampati civil hospital-ni samba jolo donggipa Ampati Bolsalgre jolo, scooty-o re·angenggipa paningsa sakgniko saldapeaha aro a·sel ong·anio paningsa sakgnian janggitangtangko gimaatna nangaha.
Koborko on·ani gitade, ia a·sel ong·ani mijal Sukrobar pring 7:20 bajimango ong·aha aro ua somoio ia paningsa, pringni cha baksa cha·na gita cha·ani brena re·ange an·tangni scooty-o noktangona re·bapilengachim. Uamangni nokona dakanggipa ramako dogatna skang rang·san, ro·ong sale re·angenggipa ML-09A 4135 truck gari, uamangni scooty-ko salchepeaha aro rasong gribee uamang paningsa ua biapon janggi galaha.
A·sel ong·ani ja·mano truck gariko saltimgipa ua biaponi kate jokna jotton ka·ahachim indiba a·sel ong·aniko nikrikgipa mande saksa uko rikangenba ja·mano a·palo kam ka·soenggipa manderangni dakchakanichi ia mandeko rim·na man·aha ine kobor on·timgiparang parakataha.
Ia a·sel ong·anio so·otako man·gipa mandeara bilsi 39 ong·gipa Tenganbil M Marak aro uni bilsi 6 ong·gipa depante ong·achim.
SWGH a·jao ro·ong salgipa truck gari bolsa, paningsa sakgniko saldapa
Date:
Share post:
