JJM-ni kamrangko somoi gita matchotatchina contractor-rangko mikrakata

SHILLONG: Jal Jeevan Mission (JJM)-ni ning·o kamrangko man·e ka·eng-gipa contractor-rang somoi gita matchotjagenchimode department kamko ra·pilna gita chanchienga ine a·dokni PHE Minister Renikton Lyndoh Tongkhar aganaha.
Mitam contractor-rang-ko somoi gita kamrangko matchote ka·e on·na man·-jani gimin adita chang-rangna uamangko gisik ra·ataha ine parakani ja·-man, Tongkhar-ni aganani gitade PMGSY scheme-ni ning·o kamrangko ka·eng-gipa contractor-rangko blacklist-o dona gitade uamangni kosako ua ja·ku de·aniko dakjawa.
“Indiba, Jal Jeevan Mission-ko ja·rikanio maming dakeba neng·nikaniko man·a nangjana gita je contractor-rangan somoi gita kamrangko ka·e on·na man·ja uamangni kam-rangko ra·pile sakgipin contractor-na pakwatskana nanggen. Indake, re·ba-enggipa jarango JJM-ko ja·rikanio ta·rakbatatna gita an·ching kam ka·anirangko ta·rakbatatna jotton ka·na nanggen,” ine Tongkhar aganaha.
Re·anggipa chango Chief Minister Conrad K. Sangma-ni u·iatani gitade Pradhan Mantri Gram Sadak Yojana (PMGSY)-ni ning·o kamrangko ka·eng-gipa firm-rang somoi gita matchote ka·e on·na man·jani gimin ge 15 firm-rangko blacklist-o donaha.
Indakmitingo, a·doko donggipa songrangrang-ona 100% chi pipe-rangko sale on·naniko 2022 bilsini December jao matchotatna gita sorkari miksongenga ine Tongkhar u·iataha.
Tongkhar-ni aganani gitade JJM-o pangchake ka·enggipa kamrang da·o dipet 20 percent-ni gitasan matchotkuaienga.
“Chinga ia bilsi bon·a-chipak 30 percent chi pipe sale on·nani kamrangko matchotna gita miksong-enga,” ineba ua aganaha.
2020-21 bilsirango, a·dok sorkari songo dong-gipa nokdang gimik gimang lak 5.89-rangoni lak 1.80-rangna chi pipe-rangko sale on·na gita chanchienga.
Meghalaya a·dok 2020-21 bilsirango song dam 1096-rangna 100% chi pipe-rangko sale on·na gita chanchienga.
Unbaksana, bang·gija salrangna skanggipa mangmang PHE Minister aro adita a·gipi officialrang Karnataka a·dokona JJM-ko ja·rikani bidingo skie ra·na study tour-ni gita wenangaha.