TURA: 15th Finance Commission-ni ning·o gong kror 1.57 tangkarangko Tura GHADC constituency-na chama ine agananiko Tura-ni BJP MDC Bernard N Marak jegalatenba, ia tangkarangko GHADC-ni chief executive membor aro gipin executive membor-rangni quarter-rangko taridapna gitasa chamskaaha aro tangkarangkoba nangana bate chamaha ine matnangataha.
Marak-ni parakatani gitade, CEM aro EM-rangni quarter-rangko taridapna komibeoba gong lak 5-mangkosan nangaigenchim indiba quarter nokprakkon taridapna gita gong lak 20-mangko chamskaaha.
“GHADC-ni CEM Benedic Marak aro Chief Minister-ni boningtang sakgni, Anseng aro Grahambell Sangma baksana gipin membor-rangni quarter-rangko taridapna gita gong kror 1-mangko chamaha aro iako uamang Tura constituency-na chamgipa tangka paisarangko man·chapataha,” ine Tura-ni MDC parakataha.
Quarter nokprakko taridapanio gong lak 5-mangsan koros ong·aigenchim indiba quarter-rangko taridapna gita Executive Committee, tangka paisarangko nangana bate chamaha ineba Marak parakataha.
Manderangni namgnina chamatgipa tangka paisarangko jakkalsretahani gimin ua GHADC-ni CEM Benedic Marak, EM-rang, CEM-ni chief adviser Akki Sangma aro High Powered Committee Rudraswar Ch Momin-ni kosako FIR-koba ka·aha.
Marak-ni parakatani gitade, Hawakhana-ni Council Colony-o Forest Advisory Committee Chairman-ni quarter nombor 16-ko taridapna gong lak 20, Hawakhana-ni Council Colony-o EM I/c Transport-ni quarter-ko taridapna gong lak 20, Araimile-ni Council Colony-o EM I/c Rural Development-ni quarter-na lak 20, Araimile-ni Council Colony-o CEM-ni quarter-na lak 20 aro Araimile-ni Council Colony-o EM I/c Taxation-ni quarter-na gong lak 20-ko Executive Committee chamahachim.
“Ia tangkarangara Tura constituency-ni ning·o donggipa gittimrangko namdapatna gita chamgimin tangka paisarangsa ong·achim indiba uamang angna u·iatchenggija tangka paisarangko chame ra·aha,” ine Tura-ni BJP MDC parakataha.