SHILLONG: Health aro Family Welfare, C&RD-ni Principal Secretary, P Sampath Kumar, baksa Health Family Welfare-ni Director, Dr. S Nongbri aro West Garo Hills Deputy Commissioner, Ram Singh mang August 6 tariko Multi Facility Centre, Asanang, Rongram C&RD Block-o Block War Room meeting ba tom·aniko ong·atgipao bakko ra·angaha.
Tom·anio aganprakengon, Sampath Kumar, Covid-19 sabisini kenbegni aroba ia sabisi songo-noko maikae giproroa, uani bidingo talate on·angaha. Tika su·kugijagiparangde 100%-na sabisi man·ani chol donga ine aganenba, tika su·e ra·tokchina gitaba ua manderangko didiaha. Manderangko tika su·atna man·a gita daito ra·e kamrangko ka·china gitaba Kumar, Village Employment Councils (VECs)-ko didiangaha.
Unomitingo COVID tikarangko su·e ra·enba ia sabisi sajinmaoni an·tangtangko balchange ra·china gita, Dr. S Nongbri manderangko aganaha.
Tika su·kugijagipa manderang sabisiko gipatenga aro skia poraia donggipa manderang mangba Turao COVID tikarangko su·na siktokjaenga ine West Garo Hills Deputy Commissioner, Ram Singh aganaha.
A·jolni manderang baditana COVID tikarangko su·ahachim, uni hisaprangko tom·anio a·bachengon, Asanang aro Babadam PHC-rangni Medical aro Health Officer-rang talate on·angahachim.
Rongram Block-ni BDO, Shelly Ch Momin sokbagiparangko rimchaksoani kattarangko aganan baksana tika su·ani baditana namgni ong·achim, uakoba talate on·angaha.
