SHILLONG: Saksa bilsi 14 ong·gipa me·chik bi·sako kal·aka ine matnangako man·gipa toromnni kamal James Paranathu-ko police Mongolbaro East Garo Hillso rim·aha.
East Garo Hills SP Bruno A. Sangma agana je, mat-nangako man·gipa kamal, darangnaba mamingkoba agangija Guwahati-chi katchipe dongengachim.
“Ua Guwahationi re·ba-pilon, ua uo sing·anirangna aganchakaha aro interim bail-ko bi·ahachim indiba Court, mijalo uni bi·aniko ra·chakna jechakaha aro uko rim·aha,” aro joljol judicial custody-o donataha ine SP u·iataha.
Ma·a paani kamchi re·angmiting somoio ua-mangni bilsi sokkugijagipa demechikko kal·aksoaha ine mantangenba, me·chik bi·sani nokdangni man-derang Father James Paranathu-ni kosako FIR ka·a·ahachim.
Ia a·sel re·anggipa July 24 tariko ong·ahachim. Bi·sani grapako nikenba ma·gipa pagipani bi·sao sing·on Fr. James re·bae uko kal·akaha ine agan-chakachim.