TURA: Tura-ni Rongkhon Songgital gittimo Tura Municipal Board (TMB)-ni skatang jabolrangko galengani a·sel jabolrang ka·mao donggipa gopram aro Ringre chiringonasa jokangenga ine Rongkhon Songgital Youth Environment Committee (RSYEC) matnangatenba, TMB-ni jabol galchakgipa biapko sal 12-ni gisepon gipin biapona apjitangchina dabiangaha.
RSYEC-ni parakatani gitade, 2018 bilsini December 17 tarikon Rongkhon Songgital gopramoniko jabolrangko rongtalatchina gita Meghalaya High Court ge·etaniko on·manahachim indiba da·alonan ia gopramona jokange sikkonge dongenggipa jabolrangko TMB rongtalatkujaengachim.
“Meghalaya State Pollution Board-ni dongimin niamrango pangchakesa jabolrangko galchina ge·etanikoba on·ahachim indiba ia ge·etaniko TMB ja·rikjaenga. Ia jabol galchakgipa biapo skatang jabolrangko galengani a·selan ia jabolni bibarangchi Rongkhon Songgital jolo songdongenggipa manderang neng·nikanirangko man·tokenga,” ine RSYEC-ni dilgiparang parakatenba, TMB-ni jabolrangko gipin biapo galskachina, ia jabol galchakgipa biapo retaining wall-ko rikchina aro ia biaponi gopram aro chiringona jokanggipa jabolrangko ta·raken rongtalatchina dabiangaha.
RSYEC-ni parakatani gitade, da·o ia Rongkhon Songgital gittimo songdongenggipa manderang bang·ahani gimin ia biapo jabolrangko galchakna gita kragipa biap ong·jaengahachim.
“Uni gimin sal 12-ni gisepon TMB-ni jabolrangko gipin biapo galskachina, gopram aro chiringona jokanggipa jabolrangko rongtalatchina aro jabol galchakgipa biapo retaining wall-ko rikchina chinga dabienga aro ia sal 12-ni gisepo chingni dabianirangko chu·sokatjagenchimode chinga jabol salgipa garirangko champengsogen aro jabol galchakgipa biapko chipe donatgen,” ine RSYEC-ni dilgiparang parakataha.
Iani bidingo RSYEC, West Garo Hills a·jani Deputy Commissioner, TMB-ni official-rang aro gipin official-rangnaba sedoataha.