SHILLONG: Re·anggipa Mongolbar salo Shillong songjinmani Laitumkhrah jolo IED bomako gopretani ja·man, songjinmani mongsonggipa biapo boma gopretgen ine sorkario maming chanchisoa dongjachim ine Meghalaya a·dokni Home Minister Lahkmen Rymbui, ku·rachake aganaha.
Shillong songjinmani mongsonggipa biapo boma gopretaniara sorkarina mikrakataniko on·ani gita ong·aha ineba ua aganaha.
Home Minister-ni parakatani gitade, Shillong songjinmani mongsonggipa biapo boma gopretaniara Intelligence-ni kamrango chu·sokgijaniko mesokanide ong·ja indiba kamko ka·anio adita dakgualaniko mesokanisan ong·aia.
A·dokni mongsonggipa biaprango iandake bomarangko gopretgen ine maming chanchisoanirang dongjachim ine talataniko on·angengon, batanggimin somoirangoba a·dokni dingtang dingtang biaprango bomarangko gopretahani gimin iandakgipa a·selrangko name nirikkie police-rangni kamrangko mikrakbatatna nanggen ine Home Minister parakataha.
Iandakgipa a·selrangko champengsona gita mikkangchi mikrakbate kamko ka·na nanggen ine janapatengon, joltangtango chanchichipna kragipa manderangni kamrangko ba re·ruraanirangko nikgenchimode ta·raken police-rangna kobor on·china gita Home Minister, a·doko songdongenggipa manderangkoba didiataha.
Hynniewtrep National Liberation Council (HNLC) bobil dolni bandh-ko ong·atani bidingo koborko songbadrango seatjahani gimin media ba kobor on·timgiparangna ka·mikkenataniko on·ani bidingo janapatengon, ian namen ra·chakna man·gijani ong·a aro media-ni kosako ka·mikkenataniko ra·pilna nanga ine Home Minister parakataha.
Home Minister-ni parakatani gitade, Press Council of India (PCI)-ni on·gimin niam gita Constitution-o pangchakesa media ba kobor on·timgiparang kamko ka·engani gimin darangba media-ko drana ba ka·mikkenatna bil dongjachim.
Re·anggipa Mongolbar salo, Shillong songjinmani Laitumkhrah-o IED bomako gopretanichi me·chik saksako man·chape sakgni manderang saknaanirangko man·na nangahachim. Ia boma gopretani ja·mano HNLC bobil dol, ia boma gopretanio jak donga ine an·tangtangan parakatskaahachim.
