TURA: West Garo Hills-ni a·kawe jolo donggipa Phulbari Police Station aro Demdema C&RD Block-ni ning·o ga·akgipa Diganggre songona maming pangchakani gri denggu dakna miksonge napdrabagipa gipin jat saksako songni manderang rim·aha.
Songni dilgiparangni aganani gitade, rim·a man·gipa mande (gipin jat)-ara ua jolo mikkang nikronggijagipa mande ong·a. Ua Phulbari-oni Dadenggre-ona, A·gitchak bajar gita re·gipa rama-sorok joljol walni somoio re·baenba Demdema C&RD Block-ni ning·o ong·gipa Rong·matchok IB sepangni Diganggre songona pringni somoio sokeaha.
Rim·a man·gipa mandeko songni manderang sing·on, ua an·tangni biming aro songko aganjaha aro ua an·tangko galchipgipa sil aro uandakgipa bosturangko ra·kolame palbadinggipa ine aganchakaha.
Indake ong·engon, songni manderang da·ororo Garo Hills-ni dingtang dingtang biaprango ‘blackman’, chong·motan denggu dakgipa manderang walni somoio ong·katenga ine social media-rango jangengako knasoenba, ua mandeba indakgipa ‘blackman’ ba denggu dakgiparangoni saksa ong·na kraa ine potchipe uko changduule rim·enba rama-soroksamo jakbikpil kae donskaaha.
Denggu dakgipa mandeko rim·ani ja·mano, songni manderang uni ra·bitgipa bosturangko nirikkie ra·ahaon, mamingkoba man·jaha, indiba uo gipiniko cha·ubagipa mobile phone ge·sa, aro jola chongipao ra·bitgipa chonchongipa silgitting aro uandakgipa adita silni bosturang, chong·motan bijolini siliting den·tongtonggimin gita dakgipa bosturangko man·aha inba koborna u·iataha.
“Uni ra·bitgipa bosturangko tale-roke nirikkie ra·ani ja·mano, adita silni chonchongipa bosturangna agreba, gipin matsramgipa aro gamchatgipa bosturang mamingkoba uoniko man·jahani gimin, uan saoba jolni manderangko rim·gittangna, ra·seke ra·na, saniba mal gam-jinko cha·ue ra·angna aro dakait dakna miksonge cholko nirikkie, am·sandie ra·chenggipasa ong·engnaba donga,” ine songni manderang potchipskaenga.
Uan bebe ong·genchimode namen jajrengsona nangao ga·akenga ine ua mandeko talbate sing·sandie ra·angkuchina gita songni manderang Phulbari Police Station-na joljol kobor on·atenba rim·a man·gipa mande (gipin jatko) police-rangni jako pakwatangskaaha ineba songni manderang koborna parakaha.
