SHILLONG: Re·anggipa Robibar saloni Sombar salona konta 24-ni gisepo sak 352 manderang Meghalaya a·doko COVID-19 man·dapaha aro da·o a·doko COVID man·ani adita komiroroangengaha ine nikna man·aha.
Ia apsan salon sak 8 manderang a·dokni dingtang dingtang biaprango COVID man·e siangskaaha aro ian a·doko COVID man·e sigiparangni komikujaenganiko mesokani ong·enga.
Konta 24-ni gisepo COVID-19 man·dapgipa sak 352 manderangko channe da·o Meghalaya a·dok gimiko COVID-19 man·e dongenggiparang gimik sak 3761 gapengaha aro ia apsan salon mande sak 8 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1235 gapskaengaha.
Konta 24-ni gisepo COVID man·gipa sak 352 manderangoni sak 6-de East Garo Hills-o, sak 4-de East Jaintia Hills-o, sak 241-de East Khasi Hills-o, sak 1-de North Garo Hills-o, sak 28-de Ri Bhoi a·jao, sak 2-de South West Garo Hills-o, sak 2-de South West Khasi Hills-o, sak 4-de West Garo Hills-o, sak 24-de West Khasi Hills-o aro sak 40-de West Jaintia Hills a·jao ong·a.
Salsani gisepo COVID man·e sianggipa sak 8 manderangoni sak 6-de East Khasi Hills-o aro sak 2-de West Khasi Hills a·jao ong·a.
Ia apsan salon gimik sak 649 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 67,164 gapskaengaha.