TURA: South Garo Hills a·jao border haat damgittamko kulidapchina aro Baghmara-o Land Custom Station-ko ta·raken chalaichina gita Garo Students Union (GSU) Mindikgre regional unit-ni president Greneth M Sangma dabiangaha.
Iani bidingo Shillong-o donggipa Commerce & Industries-ni Director-na sedoatengon, South Garo Hills a·jani Gasuapara, Baghmara aro Rongara-o border haat-rangko kulidapchina aro Baghmara-o chalaigija donenggipa land custom station-ko ta·raken a·bachengatchina GSU Mindikgre unit-ni president didiangaha.
“South Garo Hills a·jao ia border haat damgittamko kulidapgenchimode ian sima ari jolrango songdongenggipa manderangna dakchakanisan ong·aigija ia jolrango game ge·e man·enggipa mi misi aro me·su samjakrang indin gale bon·aijawachim. South Garo Hills a·jao man·enggipa gamchatgipa a·ningni bosturangkoba niam gnang Bangladesh-ona watatna man·gnokchim,” ine Sangma parakataha.
GSU president-ni parakatani gitade, ia jolrango border haat-rang aro land custom station dongjani a·selan niam gri badinggipa manderang, ma·manti bosturangko sima gita Bangladesh a·songona bading chiwalskaengachim.
Baghmara-o Land Custom Station-ko kuliahaode Baghmara aro gipin biaprangoni exporter-rang, kilometre 50-mang chel·gipa Gasuapara-ona re·na nangjawachim ine janapatengon, Baghmara-ni Land Custom Station-ko ta·raken kulichina GSU Mindikgre unit-ni president didiataha.