TURA: North Garo Hills a·jao segri me·chik saksako 2015 bilsionin mikchamika dakenba, ia me·chikni nok rikna chimonge dongipa tangka paisarangko ra·e katani gimin 6th MLP Battalion-ni constable saksa Kibison R Marak minggipa mandeni kosako FIR ka·doangaha.
FIR-ko North Garo Hills a·jani Mendipathar Women Police Station-ni officer-in-charge-na ka·aha aro ia me·chikni FIR-o parakani gitade, South Garo Hills a·jani Rongara jolo donggipa Chenggni Songmong-oni Kibison R Marak minggipa police constable, 2015 bilsionin ia me·chikko bia ka·na ku·rachakmikenba, ia me·chikni nok rikna chimonge dongipa tangkarangko ra·e kataha.
FIR ka·ani ja·mano ia me·chikko medical check up ka·enba, matnanga man·enggipa mandeni kosako uko drae til·ekanina aro uni tangka paisarangko ra·e katanina police-rang, mokordomako segataha ine kobor on·aha.
Koborko on·ani gitade, matnangako man·enggipa Kibison R Marak-ni asol songara Rajabala ong·achim indiba ua Chenggni songoniko jik ra·e ru·uta bilsirangonin ia songon dongengachim. 2015 bilsio ia mande, North Garo Hills a·jani segri me·chikko mikchadapenba, uko togina a·bachengaha aro uandaken ia me·chikni nok rikna chimonge donpaenggipa tangka paisarangko ra·e kataha.
“FIR-ko man·soani ja·mano police-rang, ia obostani bidingo tale am·sandianirangko dakenga aro kakketko ma·siahaon police-rang nanga gita ja·kurangko de·anggen,” ine North Garo Hills a·jani police officer saksa parakataha.
Me·chik saksako togianina police constable saksani kosako FIR ka·a
Date:
Share post:
