SHILLONG: Meghalaya a·doko gnigipa changna COVID-19 giprorotaiani gimin manderangni rochakgipa dingtang dingtang park aro uandakgipa biaprangko adita jarangna chipe donangani ja·man da·o bon·kame tika su·mane bilsi 18 batgimin manderangna dingtang dingtang biaprango manderangni rochakgipa biaprangko kulipiltaina a·bachengaha.
Sombar sal dipet a·dokni dingtang dingtang park-rang, cinema hall-rang aro uandake manderangni rochakgipa biaprangko sorkari kulipiltaina on·angaha.
Sombar salo, Shillong songjinmani mingsinggipa Wards Lake-koba kulipiltaiaha aro ia biapko kulipiltaiani ja·man adita manderangni ia biapona rona re·angako aro ia biapo kam ka·enggipa manderangni rongtal an·talatanikoba nikna man·aha.
Ia park-rangko kulipiltaiengon, tika su·gimin manderangsan napna gita man·enga aro tika su·ani certificate-rangko mesokna man·gijagipa manderangde napna man·jawa ine official-rang u·iataha.
Indake ong·genchimoba, Lady Hydari Park-kode Sombar salo chipe donrongani gimin gipin park-rangko kulipiltaiani somoioba kulijaha aro ia park-ko Mongolbar sal dipet kuliskanaba gnang.
Meghalaya a·doko manderangni rochakgipa biaprangko kulipiltaina a·bachengengahaon, manderangko tika su·e ra·china gita East Khasi Hills a·jani Deputy Commissioner-ba didiataha.
“COVID-ni tika ponggnikon man·a dipet ta·rake su·e ra·china chinga mande sakantikon didina ska. Ja·delgimin manderang badita seng·gnang tikarangko su·e ra·na man·a, ugitasa an·ching an·chingni dedrangrangkoba naljoke rakkina man·gen,” ine East Khasi Hills a·jani DC parakataha.