SHILLONG: Sixth Schedule-ni Para 12 A (b)-ko taridapna gita ma·mong sorkariko didina Assembly-o official resolution-ko ra·china Hill State People’s Democratic Party (HSPDP), NPP-chi dilenggipa MDA sorkariko didie bakan sedoatgen ine u·iataha.
HSPDP-ni dilgipa aro a·dokni Cabinet Minister Renikton Lyngdoh Tongkhar-ni u·iatani gitade, Sombar salo HSPDP-ni Central Executive Committee (CEC) tom·e chanchirimangenba, iani bidingo a·dok sorkarina sedoatna manchiangaha.
Sixth Schedule-ni Para 12 A (b)-ko taridapani bidingo ma·mong sorkariko didina gita da·o ong·atna sienggipa Assembly-ni Autumn Session-o official resolution-ko ra·china didie HSPDP, a·dokni Chief Minister-na sedoatgen ineba Tongkhar parakataha.
Ia Sixth Schedule-ni Para 12A-ara Parliament-ni niamrango aro Meghalaya a·dokni autonomous district aro autonomous a·jarango nangegipa niamrang ong·a aro section (b)-o janapgimin gita, Meghalaya a·dokni autonomous district ba autonomous region ba a·dokni je bakrangoba Parliament-ni maming niamrang nangchakeani dongjana gita President u·iataniko on·na man·genchim.
Indake ong·engon, Sixth Schedule-ni a·jarango ma·mong sorkarini niamrangko ra·gatjana gita a·dokko bilakbatatanian ia niamko taridapani ong·genchim ine HSPDP-ni dilgipa parakataha.
A·dokni Chief Minister Conrad K Sangma, Garo Hills-oni Shillong-ona re·angpilahaon, HSPDP iani bidingo chief minister-na seatgen ineba ua parakataha.
