TURA: A·chikrangoni skanggipa political dilgipa Pa Sonaram R Sangma-ni chang 105-gipa siani salko da·al August-ni 27 tariko Sonaram R Sangma Memorial Trust Society-ni gita Damra Bakrapur songo chone maniangenga.
Ia program-ko ong·atenggipa doloni koborko on·ani gitade, COVID-19-ni giproroaniko champengna sorkarini dongimin niamrang dongani gimin ia chang Pa Sonaram R Sangma-ni siani salko dal·e manigija joltangni manderangsan dikdiksa tom·e manienga.
Pa Sonaram Sangma-ni siani salko gisik ra·na gita da·al pring 11:00 bajioni 11:30 bajiona kan·dike bi·aniko ong·atanggen aro uni ja·man dingtangmancha ia program-ona okamatako man·gipa dingtang dingtang dolni dilgiparang, ua biapo tarie donenggipa Pa Sangma-ni bimango pul malarangko done mande ra·pilskaaniko dakanggen.
Iani ja·man Pa Sonaram Sangma sagina mande ra·pilskaaniko dakna sikgipa manderang donggenchimode pring 11:30 bajioni attam 1:00 bajiona COVID-na dongimin niamrangko ja·rike dakangna cholko man·gen ine Memorial Trust Society u·iataha.
Pa Sonaram R Sangma A·chikrangni gisepo skanggipa politics-ni kamko ka·dilchenggipa aro an·chi pari nika gri British sorkarini kosako dakgrikdilchenggipa ong·achim. Ua da·ororoni manderang gita skia man·begipa mande ong·pajaoba namen ka·donggipa aro an·tangni bebera·anio mogija kim·kimgipa ong·achim. Ua A·chik jatko gipin jatrangni sinchep dokchep dakanirangko nike A·chik jatko chel·chakna gita an·tangko on·kange kamko ka·aha aro uandaken ua 1899 bilsimango jatna aro a·songtangna kamko ka·chakataha.
Pa Sonaram Sangma, 1916 bilsini August 27 tariko, be·enni gita saaniko man·e Bakrapur songon a·gilsakko wate re·angaha.
