TURA: South Garo Hills a·jani headquarter Baghmara-o oxygen cylinder-rangko donchakna gita rikenggipa nokni obosta namsrangjaenga ine Garo Students Union (GSU) Southern Zone parakatenba, iani bidingo ia nokko rikenggipa contractor-ni kosako South Garo Hills a·jani Deputy Commissioner-na badi ka·doangaha.
GSU Southern Zone-ni general secretary Sengrak T Sangma-ni parakatani gitade, Baghmara-o oxygen-rangko donchakna gita rikenggipa nokko namgijagipa bosturangchisa rikenga aro ian bakan nosto ong·pilainagipasa ong·engachim.
“Ia sal somoirango COVID-19 giproroengani gimin oxygen-rangko chu·onga gitan nangenga aro oxygen-rangko donchakna gita nokko rikengon, maming simsakani grisa rikgenchimode mikkangchi bang·a neng·nikanirangkosa chagrongna nangao ga·akgen,” ine GSU Southern Zone-ni dilgipa parakataha.
Ia nokko gital dake rikpiltaichina dabiangengon, ia nokko rikenggipa contractor-ni kosako nanga gita ja·kurangko de·china GSU, South Garo Hills a·jani DC-ko didiataha.
Indake ong·engon, Baghmara civil hospital-o doctor aro gipin kam ka·giparang chu·ongjaengani a·sel sagiparangsan ong·aigija hospital-o kam ka·giparangba neng·nikanirangko chagrongna nangtokenga ine GSU Southern Zone parakatenba, ia hospital-na doctor aro gipin kam ka·giparangko on·dapchina South Garo Hills a·jani Deputy Commissioner-ko didiataha.
