Shillong: Meghalaya-ni Deputy Superintendent of Police Firoz Rahman, jean Assam-Meghalaya sima ario golmal ong·ao saknaa man·ahachim, ua golmal ong·anio Assam police dolrangni ding·chauatani a·selsa golmal ong·aha ine aganaha.
Ri-Bhoi district-ona post ka·ata man·gipa Rahman-ko district administration mni Butbar salo Umlaper-o Assam police-rangni rike donggipa camp-ko jolni manderang changdule dongani gimin ua obostako nirokna watataha. Ua jolo golmal ong·ani koborko man·a joloan team baksa sokangaha, uandake golmal ong·gipa biapona sokangon jolni manderang chingko napna on·aha, indiba re·bapilmitingo ramako champengaha, ine Rahman aganaha.
Ua somoio Assam Police, chingna dakchakgenkon ine ka·dongachim indiba uamangni mamingkon dakgija nie dongaha. Jolni me·asarang chingko chadrapaha. Nepali aro Karbi manderangba re·bae angko aro ang driver-ko chadrapaha, ineba agandapaha.
Indake ong·engon saknaa man·gipa officer da·o Shillong-ni private hospital-o sannaniko ra·enga. Mni Mongolbar salo Ri-Bhoi aro Assam-oni contingent-rangko Umlaper-o police camp-ko nosto ka·e galanio golmal ong·anina watataha. Sakni me·asarangko dokani gimin jolni manderang ka·onange camp-ko nosto ka·e galskaha.
Rahman aro uni team Butbar salo ua golmal ong·gipa biapona obostako nirokna sokangaha. Ua somoio Rahman chadrapa man·aha.
Assam Police personnel-rangsan ka·onange donggipa manderangko ding·chauatahakon, maina chingko chadapani somoio uamangde chu·gimik gear gane dongachim, ineba police officer aganaha. Minggipin Chief Minister Conrad K Sangma aro Assam CM Himanta Biswa Sarma, sima ario meligrikgijaniko tom·tomatna kam ka·na a·bachengataha.
