SHILLONG: Meghalaya a·doko Congress dol maming ka·donganirang dongjaengahani giminsa dolskarangko matnangna jotton ka·enga ine Robibar salo United Democratic Party (UDP), Meghalaya Pradesh Congress Committee (MPCC)-ni gital president Vincent H Pala-ni kosako matnangatskaaha.
UDP dolni kosako Pala-ni matnange agangipa kattarangna aganchakaniko on·angengon, uni agangipa kattarangara, an·tangko a·doko dilgipa ong·e ine mesokna jotton ka·anisan ong·aia ine UDP-ni general secretary Jemino Mawthoh parakataha.
“Pala da·o a·dokni politics-ona re·bapilahani gimin Congress dolko saksa dilna man·gipa ine an·tangko mesokna jotton ka·enga. Uni agangipa kattarangna manderang maiko aganchaka an·ching nina,” ine UDP-ni general secretary aganaha.
National highway-rango niam gri tangkarangko gile UDP dol, home department-ko jakkalsretaha ine MPCC-ni gital president Pala, UDP-ni kosako matnange aganahachim aro adita salrangna skang a·doko so·sojengjeng ong·angani giminba UDP dolko kratcha·na nanga ine aganahachim.
2018 bilsini Assembly election-o UDP dolni, sak 6 MLA-rangsan cheaiahaoba maini gimin manderang, UDP dolni kosako re·na jotton ka·tokenga ine janapatengon, “Khasi aro Jaintia Hills a·jarango manderang national party-rango bebera·na man·jahani gimin 2023 bilsiode UDP chegipa ong·na sienga aro iani giminsa manderang UDP-ni kosako re·na jotton ka·tokengakon,” ine Mawthoh parakataha.
Ia sal somoirango ong·enggipa obostarangna gitcham Congress sorkariko matnangatengon, gipinrang baksa tosusagenchimode a·doko Congress dolan ru·utbate sason ka·aha aro ia sal somoirango ong·enggipa obostarang gimikan Congress sorkarioniko man·rikgipa obostarangan ong·a ine UDP-ni general secretary parakataha.
“Ian Congress dolni tang·onaniko mesokani ong·enga aro uamang UDP-ko skatang matnangna nangja. Uamangni agananiko bebera·na gita manderang mikgri ong·ja,” ine Mawthoh aganaha.
Home Minister-ni kamko watchina Lahkmen Rymbui-ko UDP dolsa didiaha ine Pala-ni agangipa kattarangkoba UDP-ni general secretary jegalataha aro Rymbui an·tangsa, HNLC-ni gitcham dilgipa Cheristerfield Thangkhiew-ko so·otanio an·tangni jak donggijaniko mesokna gita kamtangko watna tik ka·aha ine talataniko on·angaha.