TURA: West Garo Hills a·jaoba COVID-19-ni batrikrikaniko warachakangkuna gita lockdown-ko ra·gatkuengon, manderangni namgnina district administration, dingtang dingtang niamrangko re·baenggipa September 6 tarikona donangtaiaha.
Dokkanrangko kuliani bidingo talataniko on·angengon, nangchongmotgipa dokkanrang, jekai galamal, dud, be·en, me·su aro uandakgipa dokkanrangko Sombar saloni Sonibar salona pring 8:00 bajioni attam 5:00 bajiona kulianggen indiba non-essential ba nangchongmota ong·gijagipa dokkanrangkode Mongolbar, Budbar, Bristibar aro Sukrobar salrangosan pring 8:00 bajioni attam 5:00 bajiona kulianggen ine West Garo Hills a·jani Deputy Commissioner u·iataha.
Dokkanrangko kuliengon dokkano dongtimgipa ba dokkan nokgiparangni tika su·a su·gijaniko see tape donchina gitaba Deputy Commissioner u·iataha.
Sorkari office-rangkoba, ma·mong sorkarini office-rangko man·chape West Garo Hills a·ja gimikon pring 10:00 bajioni attam 5:00 bajiona kulina man·gnok ine DC parakataha.
Walantian attam 6:00 bajioni pring 5:00 bajionade corona curfew-ko ong·atangkugen aro Robibar salode a·jani pilak biaprangon chu·gimik lockdown-ko ra·gatangkugen ineba DC parakataha.