TURA: South West Garo Hills a·jaoba COVID-19-ni batrikrikaniko warachakangkuna gita lockdown-ko ra·gatkuengon, manderangni namgnina district administration, adita niamrangko ra·gate on·angtaiaha.
Dokkanrangko kuliani bidingo u·iataniko on·angengon, nangchongmotgipa dokkanrangko Sombar saloni Sonibar salona pring 8:00 bajioni attam 5:00 bajiona kulianggen indiba non-essential ba nangchongmota ong·gijagipa dokkanrangkode Sombar, Budbar, Bristibar aro Sukrobar salrangosan pring 8:00 bajioni attam 5:00 bajiona kulianggen ine South West Garo Hills a·jani Deputy Commissioner u·iataha.
Dokkanrangko kuliengon dokkano dongtimgipa ba dokkan nokgiparangni tika su·a su·gijaniko see tape donchina gitaba Deputy Commissioner u·iataha.
Sorkari office-rangkoba, ma·mong sorkarini office-rangko man·chape South West Garo Hills a·ja gimikon pring 10:00 bajioni attam 5:00 bajiona kulina man·gnok ine DC parakataha.
Bazar antirangko kulina on·engahaoba antio changprak cha·gipa antirangkode kulina on·kujaenga ine u·iataha.
Skul aro college-rangko sorkarini ge·etgimin gita September 1 tarikoni kulipilna man·gen indiba skul, college-rangko kuliengon, sorkarini dongimin niamrangko ja·rikesa kulina nanggen ine South West Garo Hills a·jani District Magistrate u·iataha.
Walantian attam 6:00 bajioni pring 5:00 bajionade curfew-ko ong·atangkugen aro Robibar saloba a·jani pilak biaprangon chu·gimik lockdown-ko ra·gatangkugen indiba gilja nokrangko sorkarini dongimin niamrango pangchake kulina aro ka·angna man·gen ine DC parakataha.