TURA: Sixth Schedule-ko taridapani bidingo maming ja·kurangko de·na skangba, niamrangko taridapani bidingo dingtang dingtang dolrang aro jinma baksa chanchirimchengchina gita Association for Democracy & Empowerment (ADE), a·dok aro ma·mong sorkarirangko didiangaha.
“Ia Sixth Schedule-ko taridapanichi Meghalaya a·dokni manderangna aro mongsongbate Garo Hills-o songdongenggipa Tribal manderangna mai dakgipa nangchakeaniko ra·bana man·gen, uani bidingo ramram manderang baksa aro dingtang dingtang dolrang baksa chanchirimchengna gita nangchongmotenga. Niamrangko taridapgenchimoba Meghalaya a·dokni Tribal-rangna on·gimin bilrango maming nangchakeani dongjana gita nanga. Uni gimin ia niamrangko taridapani bidingo pilakan name ma·sie ra·chengna man·ode nambata,” ine ADE-ni president Dalseng Bira Ch Momin parakataha.
A·chik National Volunteers Council (ANVC) bobil dolni Greater Garoland-na dabiani somoirangko gisik ra·atpilangengon, ua sal somoirango bobil dake chakatanichi Garo Hills-o bang·a janggirangan gimana gita nngaha aro maming namroro silroroanirang dongjahachim ine Momin parakataha.
“Ua sal somoirango dolgnionin bang·a janggiranga gimana gita nangaha aro ANVC dol, Greater Garoland-na dabianiko watgale tom·tomaona re·bapilani ja·mansa Garo Hills-o tom·tomani sokbapilaha. Ua somoio ANVC dolrang, a·dok aro ma·mong sorkari baksa Sixth Schedule-ko bilakbatatna gita songgigrikanio soi ka·aha aro iako chu·sokatna gita ma·mong sorkariba ku·rachakaha,” ine ADE-ni president parakataha.
Sixth Schedule-ko taridapna miksongenggipao BJP sorkari, salgro salaram jolrango ja·rikbaenggipa jatni niam bidik aro sason ka·ani bewalrangko nisigalna miksonganirang donga ineba ADE-ni president parakataha.
Momin-ni parakatani gitade, Municipal Board-rang aro Council-rang, District council-rang baksa apsan ong·na man·jawa ine Constitution-ni Sixth Schedule-on tale janapani gnangchim.
Sixth Schedule a·jarango Village aro Municipal Council-ni election ong·ataniko jegalatengon, ian Sixth Schedule a·jao panchayati election-ko ong·atamingsa apsan ong·enga aro district council donggipa biaprangode Municipal Board dongna man·jawa ine Momin parakataha.
GHADC-ni seat-ko dam 42-ona ra·doatna manchienggipani bidingo janapatengon, GHADC-o tangka paisani gita neng·nikanirangko chagrongna nangengani gimin dam 42-ona seat-ko bariatanide namen neng·ani ong·gen aro sak 33 membor-rangko seoke sak 2-ko nominate ka·enba dam 35-ona seat-ko bariatanian GHADC-ko name chalaina chu·onggipa ong·aigen ine ADE-ni president talatangaha.