TURA: September-ni 1 tariko Lok Sabha-ni gitcham Speaker Purno A Sangma sagini chang 74-gipa atchiani salko maniani bak gita Farmers Collectivization for Upscaling Production & Marketing Systems (FOCUS) program-ni ning·o dingtangmancha game ge·e cha·giparang baksa agangrikani program-ko Resubelpara-ni Bakrapara-o donggipa Multi Facility Centre-o ong·atangaha.
Ia program-ko ong·atanio Meghalaya Assembly-ni Deputy Speaker Timothy D Shira, mongsonggipa sokgipa ong·e bakko ra·angaha aro unbaksana North Tura-ni MLA Thomas A Sangma, Kharkutta-ni MLA Rupert Momin aro Bajengdoba-ni MLA Pongseng Marak-ba dongpae bakko ra·angaha.
Ia tom·anio Assembly-ni Speaker aro Resubelpara-ni MLA, jinmana aganprakangengon, da·al gita salo Lok Sabha-ni gitcham Speaker Purno A Sangma-ni atchiani salko gisik ra·na gita a·dokni pilak biaprangon apsan dakgipa program-ko ong·atenga ine parakangaha. PA Sangma sagini kamrangni giminba ua ia tom·anio jinmana agan-talate on·angaha.
Meghalaya sorkarini ra·gatgipa FOCUS program-ni gimin jinmana agan-talate on·angengon, a·doko game ge·e cha·giparangko ‘producers group’-rango apsan tom·ate tangka paisani gita aro dingtang dingtang cholrangchi sorkari dakchakanirangko on·enga ine Shira parakangaha.
Ia program-ko ong·atanio Chief Minister-ni adviser aro North Tura-ni MLA Thomas Sangma-na jinmana aganprakengon, ia FOCUS program-ko ra·gatanichi a·doko game ge·e cha·enggipa manderang, an·tangtangni gama ge·ani kamrangko tang·doatna man·gnok ine parakangaha. Ia program-ko ong·atahani gimin ua dingtangmancha North Garo Hills a·jani district administration-koba mittelpilangaha.