SHILLONG: Meghalaya a·doko Power department-ko a·dokni Chief Minister Conrad K Sangma an·tang ra·skaenba, Tourism portfolio-ko adagipa aro Power Minister ong·enggipa James K Sangma-na on·skana miksongenga ingipani bidingo da·o dipet maming kobor dongkujaenga ine Budbar salo James a·kangataha.
“Angade iani gimin maming kobor dongkuja aro ia pilakan Chief Minister-ni kamsa ong·aia,” ine James parakataha.
Indake ong·engon, iandake koborko on·aniara kakketan ong·a aro antisani gisepon adasa sakgnini gisepo kamko sualgrikna sienga ine kobor on·timgiparang, Budbar salo parakatskaaha.
Power department-o tangka paisarangko jakkalsreta aro kamrangko name ka·jaenga ine batanggimin somoirangonin dingtang dingtang dolrang matnangtokengani gimin iani bidingo am·sandianiko dakna a·bachengengahachim ine nikna man·a.
Kobor on·timgiparangni u·iatani gitade, Power department-ko Chief Minister Conrad Sangma, an·tang ra·skaenba, Chief Minister-ni jako ra·enggipa Tourism department-ko James Sangma-na on·skana miksongenga.
Assembly-ni Autumn Session-ko re·baenggipa September 10 tarikoni a·bachengna siengachim aro ia session-ko a·bachengna skang, adasa sakgnini gisepo Power aro Tourism department-ko on·sregrikna tik ka·skaaha ineba kobor on·timgiparang parakataha.
