SHILLONG: Umngot hydro electric project-ko chu·sokatchina nangnikengama ma ia project-ko jegalenga, name talataniko on·china gita Budbar salo a·dokni Power Minister James K Sangma, ia project-ko jegalenggipa Joint Action Committee (JAC)-ko aganaha.
Ia project-ara a·dok sorkarini mongsonggipa daitorangoni mingsa ong·ja ine an·tangni agangimin kattarangni gimin janapatengon, “Uamang ia project-ko chu·sokatchina nangnikengama ma ia project-ko jegalenga, an·tangtangan name tik ka·chengchina anga nangnikenga,” ine Sangma aganaha.
Umngot hydro electric project-ko sorkari chu·gimik ra·galahama ine sing·on, “Ia project da·o dipet ra·gala gitanjok indide uamang maiko nangskaenga?” ine Power Minister sing·doangaha.
Power Minister-ni parakatani gitade, ia project-na MoU-ko 2007 bilsio soi ka·ahachim aro ia MoU-ko da·o ong·enggipa sorkarini somoio den·galpilskaahachim.
Ia Umngot project-ara sorkarini chu·sokatna miksongenggipa list-o ong·ja ine Power Minister-ni talatani ja·man, ia Umngot hydro electric project-ko jegalenggipa dolrang, Minister-ni agangipa kattarangko chu·ongnikskajaenba, uni agangipa kattarang talbrejaenga ine parakatskaahachim.
Ia project-ni MoU-ko 2020 bilsion den·galahaoba ia bilsio manderang baksa tom·e chanchirimna jotton ka·ahani gimin JAC, a·dok sorkario sing·doangaha.
Ia project-ko chu·gimik ra·galsrangchina uamang nangnikenga ine JAC parakatahachim.
Umngot chibimao dam rikna sorkari manchiani ja·man, jolo songdongenggipa manderang aro jolni dingtang dingtang dolrang raken jegalna a·bachengtokahachim ine nikna man·a.