TURA: Sukrobar pringo, Tura-oni Km 15-mang chel·ao donggipa Rongram jolo, manderangko salangenggipa pik-up truck gari bolsa bikpile a·sel ong·aha aro ia a·sel ong·anio mande saksa so·otako man·an baksana sak 24 manderang saknaanirangko man·aha.
Koborko on·ani gitade, ia a·sel ong·ani Sukrobar pring 8:45 bajimango Rongram-ni samba jolo donggipa Rongpil songo ong·aha.
Ia gari a·sel ong·anio Bhaitbari jolo donggipa Morasuti songni bilsi 60 ong·gipa Mokbul Hussain so·otako man·aha aro sak 24 saknaanirangko man·aha.
Kobor on·timgiparangni u·iatani gitade, ia gario sakdok bi·sarangba songreangengachim indiba rasong gnange uamangoni darangba janggiko gimaatna nangjaha aro bilonge saknaanirangko man·tokjaha.
“Gari a·sel ong·anio saksa so·otako man·aha aro saknaa man·gipa manderangoni sakbrikode sanna gita Tura Civil Hospital-o donataha. Ia gari a·sel ong·anio gimik sak 24 manderang saknaanirangko man·aha,” ine West Garo Hills a·jani Superintendent of Police (SP) VS Rathore parakataha.
A·sel ong·anio bang·gija saknaa man·gipa manderangkode Asanang health centre-o sanne watpilaha ineba kobor on·aha.
“Chingni chanchichipani gitade ia gario nangana bate mande gatahani a·selsa garini jreaniko amchakjae a·sel ong·aha. Ia gario bi·sarangba sakdok dongachim indiba uamang pilakan maming ong·jaha,” ineba Rathore parakataha.