Darangba niamni kosako re·na man·ja: AL Hek

SHILLONG: Chief Minister-ni Adviser aro gitcham Health Minister AL Hek, HNLC-ni gitcham dilgipa Cheristerfield Thangkhiew-ko encounter-o so·otanio bak donggipa police official-rangko kamoniko dondipatna dabianiko MDA sorkari ra·chakna nanga ine aganaha.
Sonibar salo kobor ra·timgiparang baksa agangrikengon Hek indine aganaha, “a·dokni manderangni dabianiko knachake sorkari, manderangna kakket bichal ka·e on·na nangchongmota. A·dokni manderangnan kakket bichal ka·e on·na man·jaode, dilgipa ong·ani mai namgni donga” ine Hek agandapaha. ”
Meghalaya sorkari, ia mamlako sandina ge·etaniko on·aha indake Ka Sur Ki Nong Mawlai, encounter-o bak donggipa police official-rangko kamoniko dondipatna sorkario dabienga.
Na·a an·tangba police official-rangko kamoniko dondipatako nangnikama ine kobor ra·timgiparangni sing·on Hek, indine aganchakaha, “darangba niamni kosako ong·ja, saoba niamni kosako re·e kamko ka·aha ong·ode, uamang sastiko man·a kraa.”
Uandake ia mamlako jakgittele inquiry ka·china janapattaiha. Mawlai-ni manderangsan police official-ko kamoniko dondipatna dabienga ine ong·ja, ia dabianiara chu·gimik Khasi aro Jaintia a·jolo songdonggiparangni dabiani ong·a ineba Hek aganaha.
Indake ong·enga BJP dilgipa ia mamlako BJP leadership-ona ra·angna aganaha.
Uandake Chief Minister-na seatgipa chittio Hek, ‘darangba niamna dal·batja aro jemangan niamni kosako kam ka·a, uamangko niamo pangchake sasti on·na nanga” ine janapataha.
Unbaksana Hek aro Khasi-Jaintia Hills-ni gipin MLA-rang, Ka Sur Ki Nong Mawlai-oniko police official-rangko kamoniko dondipatna dabianio chakpaatani chittirangko man·soaha.