SHILLONG: Kamoniko ra·galna gita Opposition Congress dolni ja·ku de·ani gimin Meghalaya Legislative Assembly-ni Speaker Metbah Lyngdoh, jagokmanpilaniko parakataha.
“Anga Assembly-ni Speaker ong·e kamtangko kakketon ka·engachim aro uamangni ja·ku de·anina anga aiao inmanbeaha,” ine Lyngdoh, kobor ra·timgiparangna parakataha.
Assembly-ni Speaker-ko ra·galna gita resolution-ko ra·na salgni skangsan Congress dol, Assembly Secretariat-o chittiko on·angahachim.
Indake ong·engon, Assembly-o sak 60 MLA-rangoni sak 57-na biapko on·anian uni daito ong·a aro ua ia kamko namen chu·sokatenga ine Lyngdoh parakataha.
“Angni kamrango maiba ong·jaenga ine nika ong·ode uamang angona re·bae ku·pattianirangko aro an·tangtangni chanchianirangko agana nangachim,” ine Lyngdoh aganaha.
Meghalaya a·doko gital sorkariko rikna gita UDP dol, Congress baksa bakrimjahani giminsa uni kosako Congress dol, ia ja·kuko de·skaengakon ineba UDP-ni dilgipa Metbah Lyngdoh, an·tangni chanchichipenganiko parakataha.
Assembly-ni Speaker-ko ra·galna resolution ra·ani bidingo seatgipa chittio Congress dolni dingtang dingtang dilgiparang, chong·motan Zenith Sangma, George B. Lyngdoh, Kimfa S. Marbaniang aro Himalaya Shangpliang soi ka·achim.