TURA: Tura jillani ning·o donggipa Dachima Me·gonggre gittimo Robibar pring 11:30 bajimango, ma·sina man·gijagipa mande sakgni, nokdang ge·sao napenba, ia nokni gam-jinrangko ra·e katangaha ine kobor on·aha.
Koborko on·ani gitade, Robibar saljrakjrakon, ma·sina man·gijagipa mande sakgni mikkangtangtangko katipenba, ia nokona re·ange ia nokdangni gam-jinrangko ra·e katangaha.
Iani bidingo nokni nokgipa police-rangna FIR ka·doangaha aro FIR-o parakani gitade, ia manderang uni nokona re·angenba, uni jikgipako jak pangpil kaenba, uni nokoniko gong 16,000 tangkarangko ra·e katangaha.
Batanggimin somoirango Garo Hills-ni dingtang dingtang biaprango iandake dakait dakanirangko knasona man·genchimoba Tura jillaode iandake dakait dakaniko knasona man·rongjachim. Indake ong·genchimoba Robibar saljrakjrakon Tura jillani ning·o iandake dakait dakaniko knasoe bang·bata manderangan aiao inmantokbeaha.
Police-rangna FIR ka·gipao parakani gitade, dakait dakgipa mande sakgnian T-shirt gisim aro longpant gisimko ganachim aro uamang mikkangtangtangko katipachim.
