SHILLONG: “Azadika Amrit Mahotsav”-ko mani-ani bak gita dake Shillong-oni New Delhiona km 3000 mang chel·e mingsa ‘Freedom Cycling Rally’-ko Assam Rifles mijalo Shillongo a·bachengataha. Indiani Jakgite man·ani bilsi 75 gapaniko gisik ra·na gita ia Cycle Rally-ko ong·atenga, jeon jakgitelanina dak-grikao bak nanggipa mong-songgipa biap a·damrang-ko nappakenba New Delhio rally-ko matchotategen aro ian “Fit India Movement”-ni bak gitaba ong·gen.
Ia rally-ko, Lt Gen PC Nair, AVSM, YSM, Director General Assam Rifles mijalo Directorate General of Assam Rifles Headquarters Laitkor, Shillong-o a·ba-chengate on·aha. Iako a·ba-chengate on·anio, jakgitel-na dakgrikgipa bilsi 94 ong·gipa Krishna Lahkar aro gipinrangba dongpaa-ha. Assam Rifles, salgro salaram a·dok gimikni tom·tomanina aro naljoka-nina kamko ka·enga aro Civic Action Programrang-chi, a·dokni namroro silrorognina kamko ka·enga ine rally-ko oprake on·anio Assam Rifles-ni DG aganaha.
