TURA: Selsella C&RD Block-ko Civil Sub-Division-ona ra·doatchina dabina gita adita salrangna skang, Selsella block-ni ning·o songdongenggipa manderang, Selsella Bolsalgre-o tom·aniko ong·atangenba, Selsella Civil Sub-Division Movement Committee (SCSMC)-ko songe donangaha aro ia committee-ko re·dilna gita dingtangmancha dilgiparangkoba seokangjolaha.
Ia SCSMC-ko dilna gita seokako man·gipa manderangara, president-na Mingnen D Marak, vice president-na Salgira A Sangma, secretary-na Enithson Ch Marak, joint secretary-na Sengnang A Sangma, publicity secretary-na Kisan A Sangma, accountant-na Repnon R Marak, treasurer-na Hilda N Marak aro gipin saksku membor-rang ong·a.
SCSMC-ko songani ja·mano committee-ni dilgiparang, Garo Hills Autonomous District Council (GHADC)-ni Executive Membor I/c Forest & Environment A B Marak-ni dilanichi, Meghalaya a·dokni Chief Minister Conrad K Sangma-ko grongenba, Selsella block-ko Civil Sub-Division songani bidingo dingtangmancha memorandum-ko on·angjolaha.
Selsella Block-ko Civil Sub-Division songchina gita Chief Minister-na sedoatengon, Selsella Block-ko 1958 bilsion Assam sorkarini somoio a·bachengaha aro ia block da·o bilsi 63 ong·pilengahaoba pilakni gita maming namroro silroroanirangko nikna man·jaenga ine SCSMC parakatenba, Selsella Block-koba Civil Sub-Division songchina didiataha.
“Selsella Block-oniko ma·eke Demdema Block-ko bikotani ja·manoba ia block-ni ning·o dam 226 songrang, ge 18,045 nokdangrang aro sak 1,80,112 manderang jelbra jelsue kamrangko name ka·sokjaenga. Selsella block-ni literacy rate 54% ong·a aro ia block-ni ning·o dam 289 lower primary, dam 100 upper primary, dam 34 secondary aro dam 7 higher secondary skulrang baksana dam 2 Arts college-rangba dongani gimin da·o Selsella block-koba Civil Sub-Division songna nangani ong·engaha,” ineba SCSMC-ni dilgiparang parakataha.
Selsella block-ni wilwilao da·o dipet sub-division dongkujani gimin jolni manderang, pilak kamrangnan km 40-mang chel·ao donggipa Dadenggre civil sub-division-onasa re·angna gita nangenga aro kacharini kamrangnaba Selsella jolni manderang, Dadenggre ba Tura-onasa re·angna gita nangtokenga ineba SCSMC parakataha.
“Selsella block-o Civil Sub-Division songgenchimode sorkarini dingtang dingtang sub-office-rangko kulianichi pilak kamrangko ka·anion jolni manderangna altubagnokchim. Uni gimin pilakni gitan nigopate Selsella block-ko civil sub-division songna nangao ga·akengaha,” ine SCSMC-ni dilgiparang parakatenba, Selsella block-ko civil sub-division songna gita ta·raken kamrangko a·bachengatchina a·dokni Chief Minister-ko didiataha.
