SHILLONG: Skango Meghalaya a·dokko bak dakmitingon, a·dokni sima ariko namedake tik ka·na man·genchim, aro da·ogita Assam-Meghalaya sima arini bidingo kajia golmal ong·na nanganirang dongjawajokchim ine Meghalaya Governor, Satya Pal Malik aganaha.
A·dokni sima ariko tik ka·grikna gita Assam-Meghalaya a·dok damgnian changni chang jotton ka·genchimoba chu·sokna man·jaenga, jeni a·selan a·dok damgnini sima arirango kajia golmalrang ong·enga ine Governor aganaha.
Indake ong·genchimoba sima arirango neng·nikanirangko ru·utgijan tik ka·grikna man·gen ineba Meghalaya Governor aganaha.
“A·doko damgnini gisepo jedakgipa neng·nikanirangko chagrongengachim, uarangko tom·tomao aro melgrike kam ka·enba ru·utgijan namatgen, aro a·dok damgnini Chief Minsiter-rangan iana kam ka·na gita gisiko nangtokenga, anga ka·donga, neng·nikanirangko ru·utgijan namatgen,” Malik aganaha.
Unomtitingo a·dok damgnini gisepo sima arini bidingo chagrongenggipa neng·nikanirangko namatna gita uamangni kam ka·anio Ma·mongba, a·dok damgninan dakchakaniko on·gen ine ka·dongenga ineba Meghalaya Governor aganaha.
A·dokni sima arirangna kam ka·na gita Assam Chief Minister Himanta Biswa Sarma aro Meghalaya CM Conrad K Sangma mang sakgnian regional committee-rangko songna ku·rachakgrikaha.
Assam-Meghalaya sima ario dam 12 a·jarango sima tik ka·grikna nanggipa biaprang donga.
