TURA: Garo Hills Autonomous District Council (GHADC)-o tangka paisani gita neng·nikanirangko chagrongna nangrongengoba ia bilsini budget-ko tarianio National People’s Party (NPP)-chi dilenggipa Executive Committee, gong kror 199.23 ong·pilgipa budget-ko tarie, GHADC-ni itihaso bang·batsranggipa budget-ko mesokangaha.
Salgittamna ong·atanggipa GHADC-ni budget session-ko Budbar salo matchotataha aro ia session-ko matchotatani somoio GHADC-ni Chief Executive Membor (CEM) Benedic R Marak, ia bilsina tarigimin budget-ko council-na mesokangengon, gong 199,23,26,679,00/-ni budget-ko district council-na donangaha.
Ia indita bang·begipa korosrangna GHADC-o man·enggipa tangka paisarang baksana sorkarini dingtang dingtang department-rangoniko gong 60,25,00,000 aro cotton growers association-ni licence fee-rangonikoba gong 3,00,000/-mangko man·dapna ka·dongenga ine GHADC-ni CEM parakataha.
GHADC-ni ge 22 department-rangna tangka paisarangko chamaoni bang·bate man·enggipa department-rangara, Land & Revenue department-na gong 12,87,02,832/-, Taxation-na gong 5,48,95,525/-, Forest-na gong 21,18,26,600/-, Justice Administration-na 2,83,56,880/-, General Administration-na 10,66,23,156/-, Civil Works-na 65,9339,610/- , Agriculture-na 16,18,47,756/-, Rural Development-na 3,80,06,980/-, Council Transport-na 2,84,63,560, Loans & Advances-na 29,40,00,000/-, Relief & Rehabilitation-na 77,35,548/-, Rural Administration-na 8,36,98,088/-, Council Printing Press-na 2,63,11,914/-, Legislative department-na 3,18,03,600/-, Water Works-na 4,03,44,948/-, Tourism-na 4,78,71,312/- aro Finance department-na gong 2,92,70,570/- ong·engachim.
Indake ong·engon, ia bilsini budget-na Tura-ni MDC Bernard Marak-ko man·chape opposition doloni bang·bata membor-rangan suk ong·gijaniko aro aiao inmananiko parakattokskaaha.
“Ia budget-o gong kror 48-na baten deficit ong·engon, hisapanirangoba melijaenga. Council-o parakatani aro lekkao chapa ka·anide melijaenga. Uni gimin chinga budget-ko taridapchina aganaha,” ine Williamnagar-ni Congress MDC Alphonsus R Marak parakataha.
Tura-ni MDC Bernard Marak-ba ia bilsini budget-ko nangana bate bang·dugaaha ine parakataha.
Photo: 2021-22 bilsini budget-ko GHADC-ni Chief Executive Membor Benedic R Marak, council-ni membor-rangna parakatenga.
