SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so·otgalanina jegale aro uko so·otanio jak donggipa police officer-rangko kam ra·galchina dabie Sukrobar salo, dingtang dingtang dolrangni nangrime bikotgipa ‘Ka Sur ki Nong Mawlai’ ba Mawlai-o songdongenggipa manderangni ku·rang dolni membor-rang, Shillong songjinmani Main Secretariat building-ona re·ange, Secretariat gate mikkango churirangko galetokaha.
Sukrobar sal dipet Meghalaya Legislative Assembly-ni Autumn Session-ko a·bachengengachim aro ia session-ko a·bachengengmiting somoio, jegalenggipa manderang, churirangko gate mikkango galeaha.
Churirangko galeani ja·mano ia manderang, Secretariat gate mikkango, Cheristerfield sagina kakket bichalko on·china aro uko so·otanio jak donggipa police officer-rangko kam ra·galchina gita chrik a·boke dabiangtokaha.
Iani bidingo kobor ra·timgiparangna talataniko on·angengon, Cheristerfield Thangkhiew-ko so·otani bidingo judicial inquiry dakaniko uamang kakket bewalo aro maming dongnuani gri ong·atchina nangnikengani giminsa uko so·otanio jak donggipa police officer-rangko kam dontongatchengchina dabienga ine ‘Ka Sur ki Nong Mawlai’-ni dilgipa Marbud Dkhar parakataha.
Assembly-o ia police officer-rangko kam dontongatna ku·rachakaniko on·china uamang a·dokni Chief Minister-ko nangnikenga ineba Dkhar parakataha.
Secretariat mikkango churirangko galeani miksonganiara, re·anggipa August-ni 13 tariko HNLC-ni gitcham general secretary Cheristerfield Thangkhiew-ni nokko chadrapeani somoio ua police-rangko churichi chadrappangpilna jotton ka·ahani giminsa police-rang uko gona nangaha ine police-rangni agananiko jegalna mesokani chin ong·achim.
Ia a·selni bidingo sorkari, judicial inquiry-ko dakchina ge·etmanahani gimin inquiry matchotchenggijade maming ja·kurangko de·na man·kujawa ine adita salrangna skangsan a·dokni Chief Minister Conrad K Sangma parakatskaahachim.
HNLC-ni gitcham dilgipako so·otanina jegale Secretariat mikkango churirangko galea
Date:
Share post:
