SHILLONG: Assembly Speaker, Metbah Lyngdoh-ko uni office-oniko ra·galchina gita Opposition-ni dabianio, mandeko namnikjae dakade ong·ja ine Opposition Dilgipa Dr. Mukul Sangma Sukrobaro aganaha.
‘‘Assembly Speaker-ni kosako chinga mandeko namnikjae aganade ong·ja. Manderangni uandake a·dokni namgninasa chinga ia chanchianiko ra·gataha. Unigimin, daito ra·gipa opposition ong·e, chinga ia resolution-ko dakna nangchongmotao ga·akaha’’ ine Dr. Sangma Sukrobar salo koborni manderangna aganaha.
Ua indakeba aganaha je, da·o ong·enggipa autumn session-o jensomoion chanchianiko dakgen, ua somoio uamangni chanchigimin resolution-ni bidingo opposition namedake talataniko on·gen.
Indake ong·engon, ia resolution-ko uamang maina ra·gatachim, iani kakketko a·dokni manderangna mesokna gita uamang a·selrangko parakatgen. Uamang, House-ni membor sakantikon iani bidingo chanchianiona dilgen ineba Opposition aganaha.
Unaskango, Speaker-ko kamoniko ra·galchina gita Congress-ni rang·gitik ja·ku de·baanina Assembly Speaker, Metbah Lyngdoh, jabrangpil·ahachim.
“Anga jagokpil·jok. Anga, Assembly-ni Speaker ong·e, kamtangko kakket ong·en ka·enga,” Lyngdoh aganaha.
