SHILLONG: Mawphlang constituency-ni MLA Syntar Klas Sunn, Sukrobar attamo, Mawngap-o donggipa an·tangni noko a·gilsakko watangaha. Ua bilsi 62 ong·ahachim.
Kobor on·timgiparangni u·iatani gitade, ua adita somoirangonin be·enni gita an·sengjaengachim aro uandaken an·sengpilna man·jae ua Sukrobar attamo a·gilsakko watangaha.
Politics-ni kamko ka·na skang SK Sunn, 2016 bilsio PHE-ni chief engineer ong·e kamoni neng·takahachim aro kamoni neng·takani ja·man ua 2018 bilsini Assembly election-o Mawphlang constituency-oni Independent candidate ong·e susaenba, seokako man·ahachim.
Election-o MLA-na seokako man·ani ja·man ua UDP-ni associate membor ong·e kamko ka·aha aro uni siangaona kingkingan ua an·tangni manderangna dangdike on·engkuachim.
Uni siangani ja·man, Meghalaya a·dokni dingtang dingtang dilgiparang una kalimpaaniko parakattokaha.
