GH-ni bakrimgimin NGO-rang ILP & MRSSA-na dabidilchina sorkariko didia

TURA: Garo Hills-ni nangrimgimin NGO-rang, chong·motan (GSU, FAF, ADE, AYWO aro FKJGP)  aro pilak songdong-achagiparang Meghalaya a·doko songdong-achagipa manderangko mikkangchi naljoke rakkiani chol, jean ILP aro MRSSA-ko ta·rake ra·bae on·china gita ma·mong sorkario kingkot dabidilanirangko dakchina ine a·dok sorkariko didiataha.
Nangrimgimin NGO-rang, Meghalaya a·doko songdong-achakamgipa manderangko naljoke rakkiani cholrang da·o dipet a·doko dongkujaengani bidingo, a·paloni niam gri napdrabaenganichi a·doko songdonggiparang nangana batpile bang·batrikrikengani gimnin, jemangan niam gri napdrabaengachim uamangko am·sandie rim·skachina gitaba dabiangjolaha.
NGO-ni dilgiparangni mesoke aganani gitade, Manipur sorkari, Assembly Session-o chang gittamna kingking ILP-ko ra·gate a·bachengna gita resolution-rangko pas ka·angenba, uarangko ta·rake ra·gatangskachina ine ma·mong sorkario kingkot dabianiko dakangenga.
Apsadake, Meghlaya sorkariba, a·dokna ILP-ko ta·rake on·skachina gita ma·mong sorkariko kingkot hala ka·e dabie on·skana nangchongmota. A·doko ILP-na dabianiara da·ororo dabienga ong·ja, ia ru·utbea somoirangna dabibaenggipa ong·engachim.
A·dokni bang·a NGO-rang aro songdonggipa manderang, batanggimin 2013 bilsionin ILP-na dabianio dakgrikbaengon, ia bilsiosan sorkariko nachil songatna man·ahachim, indiba uko dabidilani palo gipin “Mechanism”, chong·motan, MRSSA-kosa ra·baskana ine jotton ka·e kamrangko ka·angskaenga ineba koborna u·iataha.
MRSSA, jenan ma·mong sorkari bon·kame nachil songahachim, uan Look East Policy-ni jaroengani giminsa ong·aha. Chinga dol 13 NOG-rangchi nangrimgimin dol mikkangchi a·doko ILP-ko on·kujaskal kingkot dabie dakgrikangkuna ine kang·kari kaenga.
Unigimin, chinga a·dok sorkariko aro opposition-ni dilgiparangko Meghalaya a·doko songdonggipa manderangni namgnina ILP-ko ra·bana gita mikkangchi dondipgija ma·mong sorkario rakbate dabidilangkuchina raken didiatenga ine nangrimgimin NGO-ni dilgiparang parakataha.