SHILLONG: Meghalaya Assembly Speaker, Metbah Lyngdoh da·al Sombar salo uni office-o a·songchengaoni bilsi gni gapenga ine koborna u·iataha.
Lyngdoh, jean Mairang constituency-o UDP-o chakate ia chango gittamgipa changna MLA ong·e dongengachim, uko skango ong·anggipa Speaker Donkupar Roy sagini July 28, 2019 bilsio tanggitik siangani ja·mano uni biap bangbang ong·e dongengani ja·manosa uko Meghalaya Assembly Speaker-ni biapna seokangskaaha.
Ua mejalo Shillong Times kobor ra·timgiparangna agan-parakatengon, ua maming saloba an·tangko Speaker ong·gen ine chanchisoa dongjachim ine aganaha.
“Angni chadambemiting somoio, anga Khyndailad-ni Meghalaya Assembly Secretariat gita re·pakrongachim. Indiba, da·alo anga Speaker-ni chokkiosa asongna man·skaenga. Mandeni janggi tanganiara sakantini chanchisokna amgipade ong·chekja,” ine Lyngdoh aganaha.
Ua an·tangni bidingo aganangkuengon, ua Assembly Speaker-ni biapoba ong·china ba MLA, Minister-rangba ong·china, jeni gadango donggenchimoba an·tangni bil ama dipet a·dokni manderangna dangdike on·anisan ong·aia ineba ua agandapaha.
