SHILLONG: West Khasi Hills District committee, a·dok damgnini gisepo a·jani sima-ari jolni a·arangna dakgrikengani bidingo a·bachenge sandiroke man·gipa report-rangko mejalo a·dok sorkarina on·eaha.
West Khasi Hills-ni Regional Committee, jekon Minister Renikton Lyngdoh Tongkhar aro gipin membor-rangchi re·dilengachim, uamang gipin official-rang baksa batanggimin chango a·dok damgnini gisepo adita nanggrikanggipa biap ba a·dam manchaona re·ange nirokeaniko dakangaha.
“Committee-rangni a·bachenge nirikkie ra·chengna ine kajia-golmal ong·chakgipa biap dambriko basee ra·gimin, jean Haim, Gizan reserve forest, Tarabari aro langpih jolrangni report-rangkode uamang, jolo donggipa songni dilgiparang, MLA aro MDC-rang baksa tom·e chanchirimanichi aro nirikkie ra·ani ja·mano matchotatna man·aha” ine HSPDP-ni padot aro committee-oni membor, KP Pangniang mejal Robibar-o parakataha.
“Committee-ni a·bachenge sandie ra·anggimin report-rangko mejalon Chief Minister-na on·eaha aro sorkarini chugipa gadangoni gita ia mamlarangko nirikkie ra·angkugen,” ineba ua agandapaha.
Uni parakani gitade, committee membor-rang, West Khasi Hills a·jani ning·o ga·akgipa dambri biap ba jolni manderangko aro uamangni a·arang chong·motko u·ie ra·na gita uamangni pilak nangchongmotgipa lekka-patrorangko sorkarina mesokchina gitaba didianiko on·angjolaha.
“Iandakgipa kamrangchin an·chingni a·a ine a·kange ra·aniko sakke on·dapani gita ong·gen aro mikkangchi a·kange ra·anio bilakbatgen,” ineba ua agan-janapangkuaha.
