SHILLONG: A·doko adita bobil dakgipa dolrangni dongani bidingo ning·joljol sandigiparangni kobor-rangko man·enga ine mijal Butbar salo Chief Minister Conrad Sangma aganaha.
“Bobil dakgipa dolrang-ni re·a-doani bidingo chinga koborko man·enga aro indake District ge·-antion gimikni gitan ning·joljol sandiani chek ka·ani aro amsandiani-rangko bilakbate dakat-enga indakani a·selsa mijaloba mingsa chu·sok-gipa kam ong·aha,” Conrad, kobor ra·timgiparangna aganao aganaha.
A·dokni Garo Hills aro West Khasi Hills a·jolo NDFB bobil dolni mande-rang roramenga aro adita chadamberang uamangko ja·rikenga ine Opposition Leader, Mukul Sangma aganaha.
“Uani bidingo chinga namen mikrakenga. Ning·-joljol namedake sandigipa dongjaode da·o dipete darang bobil dolko jaksi otjawa indiba oe uamang roramenga indiba darang dolkoba anga biming mingjawa,” ua aganaha.
A·dok sorkari nachil songja ine Opposition congress-ni matnanganina, ‘‘Nachil songja ingipani ortoara maia anga ma·sijaha indiba jensalo niam aro reti sokbaa sorkari aro police department namen mikrakenga aro uni giminsa ua pilak amsandianirangko dakenga,’’ ua aganchakaha.
“Sorkari kam ka·ja ba nachil songja ine sing·ani dongna nangja. Je opposition ba manderangoniko je koborrangko chinga man·soenga chingni kamko chinga pangnan ka·enga,” ua aganchakaha. Mija re·anggipa Mongolbar walo Tura-oni adita chel·ao Sherwood School sepango automatic rifle-chi police-ko gogipa u·i-ma·sigijagipa mandeko commandorang goe so·otani bidingo aganao, official report-ko anga nikja, silchidare gnang roramani bidingo West Garo Hills police-ni on·atako koborko anga man·soaha aro indake dingtangmancha ramao aro police silchidare kebite motor-bike re·baako chang-sotaha unon ua police-ko gaoahachim una a·jak soke goa cha·skaaha’’ chief minister aganaha. “Rasong gnange police jedakgipa obostanaba tarisoaha aro uamang ua mandeko a·jak sokaha ua saknaa man·e siangaha ua a·selkoba sanfienga,’ ua agandapaha. Ua mamlako sandiku-enga ja·mano Home Minister ba department name dake agangen, ua aganaha.