TURA: Ja·manchake koborko on·ani gitade, re·anggipa September-ni 11 tariko West Garo Hills a·jani Tikrikilla jolo donggipa mande saksa, an·tangni bagan barirangko o·rokengmiting somoio bijoli salako man·enba siangna gita nangaha.
Koborko on·ani gitade, ia mandeara Tikrikilla jolo donggipa Upper Kharsengdhap songni Rolling B Marak ong·achim aro ua somoio ua, Bondukmali songo donggipa an·tangni bagan barirangko o·rokengachim.
An·tangni bagan bariona re·angaoni walni 8:30 bajimangona noktangona sokangpiljani gimin ja·mano uni nokdangni manderang uko sandiangon, uni sigimin manggisikosa uni baganoniko nikeaha ine kobor on·aha.
Ia mandeni manggisiko nika bakan uni ma·drangrang aro songsul noksulrang, police-rangna kobor on·ataha aro uandaken ja·mano police-rang uni manggisiko ra·e nanga kamrangko matchotataha.
Koborko on·ani gitade, ia mandeni manggisio 11 (LT) KV power line-ni siliting ga·akdape dongakoba songni manderang nikeaha aro uni manggisio bijoli kamani chinrangkoba nikna man·aha.
Indake ong·engon, ia bagan ba mi a·pal gita bijoli silitingko onbee ra·sotangani gimin songni manderang skangon changni chang department-ni official-rangna u·iatahachim indiba official-rang aro lineman-rang simsakjahani a·selsa da·alo mande saksani janggiko gimaatna nangaha ine Tikrikilla jolo donggipa Association of Nokma & Gaonbura-ni president Walseng N Sangma matnangatenba, sianggimin mandeni nokdangna compensation-ko gamskachina sorkario dabiangaha.