TURA: 2021 bilsini Meghalaya Teachers Eligibility Test (MTET) porikkako ong·atna skangan 2019 bilsini MTET porikkako pass ka·e dongenggipa Dadenggre Civil Sub-Division-ni LP skul skigiparangkoba kamo donatchina gita skigiparang, a·dok sorkariko didiataha.
Iani bidingo Meghalaya a·dokni Education Minister Lahkmen Rymbui-na sedoatengon, 2019 bilsini ia apsan MTET porikkako pass ka·gimin skigiparangko gipin Sub-Division-rangode kamo ra·tokmanaha indiba Dadenggre Civil Sub-Division-ni skigiparangkode da·ona kingkingan kamo rakkikujaenga ine Dadenggre Sub-Division-o MTET pass ka·e dongenggipa skigiparang parakataha.
Skigiparangni parakatani gitade, Dadenggre Civil Sub-Division-na 2019 bilsini MTET porikkani result-rangko ia bilsini April 29 tarikon parakahachim indiba kamo rakkianikode da·onan a·bachengkujaengachim.
2019 bilsio MTET pass ka·e dongenggipa skigiparangkon kamo rakkikujaengon da·o Education department, ia 2021 bilsini MTET porikkako ong·atskana siengaha ineba skigiparang, suk ong·gijaniko parakataha.
“Education department, 2021 bilsini MTET porikkako ong·atna tariengaha ine chinga u·iataniko knasona man·aha. Chinga ia porikkako ong·atna u·iatanikode jegalenga ong·ja indiba ia bilsini porikkako ong·atna skang, 2019 bilsini MTET porikkako pass ka·e dongenggipa skigiparangkon kamo rakkichengjagenchimode ia skigiparangna kakket bichalko on·ani ong·jaengaha,” ine Dadenggre Civil Sub-Division-o MTET pass ka·e dongenggipa skigiparang parakataha.