TURA: South West Garo Hills, Deputy Commisioner (Supply) Office-ni gita mni Sukrobar salo Ampati MFC-o Consumer Awareness Program-ko ong·atangaha ine koborna parakataha.
Program-ni somoio National Food Securities Act, 2013-o pangchake jolo songdonggipa manderangna, jemangan sorkarini dakchakanika man·a kraachim, uamangna LPG, Cylinder gas-rangko indin suale on·a aro Aadhar Card-na an·tangtangko biming segatani bidingo skidape on·angjolaha.
South West Garo Hills-ni Deputy Commisioner Ramakrishna Ch. Chitturi program-o salni dal·batgipa sokgipa ong·e ua salo bakko ra·pagipa manderangna agan-talataniko on·angengon, ‘District Consumer Forum’-ko mikkangchini namgnina da·o a·bachengate on·manaha aro uan bostu bree jallakgiparangni neng·nikanirangko namatna gita mikkangchina jakkaltogipa ong·skagen ine aganaha.
Uandake, a·jani DC, jolni manderang an·tangtangko seng·gnang Aadhar Card-na biming segattokani bidingo mongsongbate mikpakma nie aganangaha, jedakode jolni manderang uamangni Aadhar-rangko Public Distribution System-o on·chape, sorkarini gita mirong-michurangko suale dakchakaniko man·a kragiparang mikkangchi neng·nikanirangko chagrongna nangmangija altue ra·chaksona man·skagen ineba ua parakataha.
West Garo Hills aro South West Garo Hills-ni Supply, Deputy Director, Nemson M. Marak, jolo man·a kragipa manderang ba nokdangrangna mirong-michu aro uandakgipa gipin bosturangko suale on·engon, uarangko ra·chakgipa manderang ba nokdangrangko altue ma·sina man·a gita biometric distribution system-ko a·bachengchina gita program-o bakko ra·pagipa dealer aro supplyer-rangko didiangjolaha.
Apsandake, dealer aro supplyer-rang mikkangchide jakkaltaitaina man·gipa kg toani misinko, jekon Metrology Department-ni gita ra·chakmanahachim uko on·china gita sorkarina dorkaso galna nanggnok ineba marak agandapaha.
Indake ong·engon, program-ona mongsonggipa ong·e sokbae bakko ra·angpaiparangoni Sainira S. Marak, jean Ampati-ni Food Safety Inspector ong·engachim uaba Food Safety Act-ni bidingo manderangna skiprakangskaaha ineba koborna u·iataha.
