Gital dormahako on·china aro ra·gala man·gipa dilgiparangko kamo ra·pilchina dabie NGEA jingjengatna a·bachenga

TURA: Garo Hills Autonomous District Council (GHADC)-o kam ka·enggiparangna gital pay scale-o dormaharangko on·china aro kamoniko ra·gala man·gipa dilgiparangko kamo ra·pilchina dabie Sombar sal dipet Non-Gazetted Employees Association (NGEA), jingjengatna a·bachengtaiaha.
GHADC-o kam ka·enggiparangna da·o jabrini dormaharangko on·na ku·rachakahaoba gitcham pay scale-osa dormaharangko on·na tik ka·ahani gimin jegale Sombar salo GHADC-o kam ka·enggiparang, kamtangtangko ka·gija salgimikan GHADC compound-o jingjengatangaha aro kamoniko ra·gala man·gipa NGEA-ni dilgiparangkoba kamo ra·pilchina gita dabiangtokaha.
GHADC-o kam ka·enggiparangna gital pay scale-o dormaharangko on·china dabitokengoba, adita salrangna skangsan Transport aro Forest tax-rangoniko gong kror 20 tangkarangko a·dok sorkarioniko man·engani gimin GHADC-o kam ka·enggiparang jabrini dormaharangko gitcham pay scale-o on·na miksongengachim.
“GHADC-o kam ka·giparangna gital pay scale-o dormahako on·na gitade japrakon komibeoba kror 6-mangko nanggen aro iandakgipa obostaode ian ong·na amgijani ong·enga. Chinga GHADC-o kam ka·giparangni man·na nangkuenggipa dormaharangko chu·gimikkon on·nade nangnikengachim indiba ianade chinga skanggipa GHADC-o tangka paisani gita bilakchengna nangenga. Iana chinga dingtang dingtang cholrangko sandiengaha indiba somoirangkode nangkugen,” ine GHADC-ni Deputy CEM Nikman Ch Marak parakataha.
Da·o dipet GHADC-ni CEM Benedic R Marak, Shillong-o ong·enga aro uni re·bapilahaon ua GHADC-o kam ka·giparangna on·na sienggipa jabrini dormahana Letter of Account (LoA)-ko ra·bajolgnok ineba Marak parakataha.
Kamoniko ra·gala man·gipa NGEA-ni dilgiparangko kamo ra·pilchina dabienggipani bidingo janapatskaengon, iani bidingo kamko ka·na songako man·gipa committee niroke ja·kuko de·anggen ine GHADC-ni Executive Committee parakataha.