SHILLONG: Saubhagya Scheme-ko jakkalsretani bidingo inquiry dakaniko jagittamni gisepon matchotate, jinmana u·iatchina gita MDA sorkario bak ong·paenggipa BJP dol, a·dok sorkariko didiangaha.
“MDA-ni tom·anio Saubhagya scheme-ni bidingo anga bang·en sing·anirangko dakaha aro ia tom·anio Chief Minister an·tangan, inquiry committee-ko songgen ine angna ku·rachakaha. Ia inquiry-ko jagittamni gisepon matchotate jinmana parakchina gita anga sorkariko aganaha,” ine Chief Minister-ni advisor aro BJP-ni state president Ernest Mawrie parakataha.
Saubhagya scheme-ko jakkalsretani bidingo dingtang dingtang dolrang, CBI-chi inquiry-ko dakchina dabitokahani gimin sorkari, iani bidingo jakgitelgipa inquiry committee-ko songna ku·rachakahachim.
Indake ong·engon, ia inquiry-ni report-na BJP sengkugen indiba uamangni nangnikani gita ong·jagenchimode CBI-chi inquiry-ko dakchina dabianggen ine BJP-ni state president parakataha.
“MeECL, District Council ba niam gri koela badingani ba uandakgipa dingtang dingtang kamrango tangka jakkalsretanirangko chinga a·bachengonin ku·rang on·enga aro mikkangchiba on·angkugen,” ine Mawrie aganaha.
Ma·mong sorkarini ra·gatgipa Saubhagya Scheme-ko Meghalaya a·doko jako ra·e ka·aniko Comptroller & Audit General (CAG)-ni am·sandianio gong kror 149 tangkarangko gimaataha ine ma·sina man·ahachim.
CAG-ni report-o parakani gitade, ia Saubhagya Scheme-ko a·dokni Power department, Delhi-ni company-na on·anichi gong kror 149.12 tangkarangko noksan ong·atahachim.
Ia scheme-ni ning·o Delhi-oni M/s Satnam Global minggipa contractor-rangni ra·bagipa transformer-rangba bostu namgijagipasa ong·e da·o bang·bata transformer-rangkon tarina gita Guwahati workshop-o donna nangengaha ineba CAG-ni report-o parakahachim.
Saubhagya Scheme-ni bidingo inquiry-ko ja 3-ni gisepo matchotatchina BJP dabia
Date:
Share post:
