TURA: Re·anggipa Mongolbar salo, Williamnagar-ni Loyola skulo poraienggipa me·a bi·sa saksa, boltong ga·akdapa man·e siangna nangahani gimin Association for Democracy & Empowerment (ADE) dolba kalimpaaniko parakataha aro skulo poraienggipa bi·sarangko iandakgipa kamrangko ka·atahani gimin skulni dilgiparangkoba raken jegalataha.
Mongolbar pringni 10:30 bajimango, ia skulni kal·chakramo dane donenggipa boltongrangko gipin biapona jitatchina gita ia skulo poraienggipa chatrorangko ge·etani ja·man, boltong ge·sako adita sak chatrorang chile donatengmiting somoio maibakae ia boltong, Class IX-o poraienggipa Cherian M Sangma-o ga·akdapahachim aro uandaken ja·mano ua saknaanirangko man·e siangna gita nangahachim.
Indake ong·engon, ia a·sel ong·anichi rasong gribee siangna nanggipa me·a bi·sani nokdangna ADE dolni gita kalimpaaniko parakataha aro skulni chatrorangko iandake kam ka·atani a·sel ia me·a bi·sa sina nangahani gimin skulni dilgiparangkoba raken jegalataha.
“Duko ga·akenggipa nokdangna chinga chingni kalimpaaniko parakatenga aro skulo poraienggipa bi·sarangko iandakgipa kamrangko ka·atahani gimin Loyola skulni dilgiparangko jegalatenga. Badiaba badiaba skulrangoba iandake bi·sarangko kam ka·atani aro sasti on·anirangko nikna man·enga indiba ian gipin skulrangnaba mikrakatani ong·china,” ine Budbar salo, ADE-ni president Dalseng Bira Ch Momin parakataha.
Skulo poraienggipa bi·sarangko iandakgipa kamrangko ka·atenggipa aro kragija dake sasti on·enggipa skulrangnaba ADE, mikrakataniko on·angaha.