SHILLONG: Re·anggipa September 16 tariko Shillong songjinmani Kse Bilat-o donggipa Meghalaya Rural Bank (MRB)-oniko cha·una am·anio jak donggipa sakgniko Meghalaya Police rim·aha.
Koborogita, Pomlakrai, Mawtharia-oni Heavy Jones Kurklang (25) aro Wahkdait, Dong Pata, Madanrting Block G-oni Shiningstar Wahlang (23) mangko police Mongolbar walo rim·aha ine East Khasi Hills-ni SP, Sylvester Nongtnger aganaha.
Mask gangipa manderang 5.15 pm-5.30 pm-ni gisepgriko rural bank-o napaha jeon me·chik branch manager-san bank-o dongaiahachim.
Uamang bank-ni do·gako nokningchini tekaha aro me·chik branch manger-ko, strong room (bilake rakkigipa)-ko kulina on·ahachim. Indake ong·genchimoba branch manager-ni ka·donge gisik matsrame kam ka·anichi, uamang chel·chake dongipa dringko kulina gita man·atjaha aro Tg. 10,000/- kosan branch manager-oniko ra·seke katangaha aro an·tangtangko rim·a man·atjana gita CCTV-ni DVR-koba ra·e katangahachim ine Nongtnger aganaha.
Indake ong·engon, dosi dakanio rim·ako man·chenggipa Kurkalang, uamangni dosko ku·rachakaha aro cha·umiting somoio uni jakkalgipa silchidarekoba uni tosok mitaponiko man·aha, uni ja·mano Kurkalang-ni agananichi sakgipin Wahlang-koba rim·na man·aha, aro uamangni ra·e katanggipa DVR-koba man·pilaha, police aganaha.