SHILLONG: Meghalaya a·dokni damgittam Autonomous District Council (ADC)-rango dingtang dingtang namroro silroroani kamrangna ma·mong sorkarini chame on·atgipa gong kror 567.71 tangkarangoniko 53 percent (kror 302.13)-kosan jakkalna man·aiaha ine ma·sina man·aha.
Comptroller & Audit General of India (CAG)-ni state finance audit report-o parakani gitade, a·dokni damgittam ADC-rang, chong·motan Garo Hills Autonomous District Council (GHADC), Khasi Hills Autonomous District Council (KHADC) aro Jaintia Hills Autonomous District Council (JHADC)-rang, 2015-16 bilsioni 2019-20 bilsiona kingking a·dok aro ma·mong sorkari dolgnionikon, tangka paisani gita dakchake on·anirangko man·soahachim indiba ia damgittam ADC-rangna chame on·gipa tangka paisarangko koros ka·ani bidingo talate on·na gita Utilisation Certificate (UC)-rangko on·skajahachim.
Ia tangka paisarangko koros ka·ani UC-rangko on·na man·gijaniara, indita bilsirangna chamatgimin tangka paisarangko maikai aro bano koros ka·aha, uko ADC-rang talate on·na man·jaha ine CAG-ni report-o janapatengon, bangki dongenggipa UC-rangko on·na nangani gimin ADC-rangna ku·pattianiko on·china sorkariko didiataha.
Bangki dongenggipa account-rangko matchotate Accountant General-na on·china gitaba ADC-rangko ku·pattichina CAG, a·dok sorkariko didiataha.
CAG-ni report-o parakani gitade, ia ADC-rangni bilsiprakni account-rang da·o bilsibrimangna kingking bangki dongkuengachim.
Account-rangko matchotatchipgija donaniara manderangni tangka paisarangko jakkalsretna cholrangko on·ani gita ong·gen ineba CAG-ni report-o mikrakataniko on·angaha.
GHADC aro JHADC-ni Fund Rules-ni gitade, ia ADC damgnini account-rangko bilsiantian June 30 tarikni gisepon Accountant General-na sokatna nangachim indiba KHADC-ni Fund Rules-ode account-ko submit ka·na gita maming tarikrangko janapa dongskajachim.