SHILLONG: A·dokni saliram jolchipak bobil dake chakatgipa dolrang changsatai nakatna a·bachengengani bidingo dingtang dingtang kobor-rangko man·soenganina an·tangni simsaksoani aro jajrengsona nangengani gimin opposition-ni dilgipa Dr Mukul Sangma, a·dok sorkariko iarangni bidingo namrenge ra·jachina aro a·doko songdonggiparang sakantina naljokaniko on·a nangbatengani a·selo iani bidingo ja·kurangko de·samsochina sorkariko didiangaha.
Dr. Mukul Sangma-ni parakani gitade, jensalo ua batanggimin 2010 bilsio a·dokni CM ong·bachengaha, unon chadamberang (manderang) gital bobil dolrangko bikote buringchi katbildangna a·bachengaha.
Uandake iandakgipa obostarangko nikna man·ahani gimin a·doko songdonggipa manderang uamangko namgipa miksonganiona chong·motan a·doko pangkamgipa tom·tomaniona an·plbajawajokkon ine namen jajrengsotokahachim.
“Indiba, buringchi katanggimin chadamberangko chinga nama miksonganina rimbapilna gita man·tokaha. Chinga uamangko namgipa miksonganio a·dokko tom·tomaona ra·bapilna gita sorkari baksa agan-golpogrikchina didiachi kamrangko rakbate ka·na a·bachengskaahachim,” ine Sangma aganengon, jensalo uni sorkariko da·o a·dokko challaienggipa sorkarina pakwataha, unon 2018 bilsio bobil dake chakatgipa dolrang dolsaba dongskagija sorkariko rikatna man·aha ine aganadapaja.
Garo hills jolo dingtang dingtang bobil dolrang, gitalgipa dolko bikottaina jotton ka·taienga ingipa koborko man·soengani bidingo aganengon, Chief Minister gitcham, iandakgipa bobil dake chakatna a·bachengengmitingo a·dok sorakri uamangna cholko on·a nangja ine agandapaha.
Sangma-ni a·dok sorkariko matnange aganani gitade, iandakgipa obostarang ba a·selrang, chong·motan sorkarini kamo tik ong·gijani, cha·bok rusiani aro bang·a kamrango sorkarini nigalani kamrangchin a·dokni chadamberang dilsretaniko man·enga, jechin uamang sorkarini kamko namnikjae, ba sorkarini kamna suk on·jae bobil dolko bikotaona dilsretako man·skaenga ine aganaha.
