SHILLONG: Meghalaya a·doko gital bobil dolrangko bikotna jotton ka·aniara jajrengna nangani ong·enga ine Sombar salo, a·dokni Chief Minister Conrad K Sangma parakataha.
A·doko bobil dake chakatgipa dolko bikotna jotton ka·engmiting somoio songsalna kam ka·gipa mande saksa baksana gipin sakgittam manderangko rim·ani bidingo sing·on, a·doko dingtang dake kam ka·anirangko nikna man·enga aro iandakgipa kamrangko intelligence-rang namen nirikkienga ine Chief Minister parakataha.
Adita salrangna skang Tikrikilla aro Tura-o ong·anggipa obostarangara jajrengna nangani ong·enga indiba police aro intelligence-rang, a·doko so·sojengjeng ong·atna jotton ka·gipa manderangko nirikkie rim·na man·enga ine Chief Minister parakataha.
A·doko iandakgipa bobil dolrang ong·kattaijana gita mikrakbee kamrangko ka·na nangengkua ineba ua aganaha.
Ia jani a·bachengachibara, songsalna kam ka·gipa Joannes Lamare aro gipin sakgittam manderangko, a·doko bobil dake chakatgipa dolko bikotna jotton ka·enga ine chanchichipenba police-rang rim·ahachim. Ia manderangko, Nagaland a·dokni Dimapur Hebron-o donggipa NSCN (IM) camp-oni re·pilbaengmiting somoio police-rang rim·soahachim.
HNLC-ni gitcham dilgipako so·otani bidingo an·tangtangko gitcham police-rang ine so·otako man·gipa mandeni jonggipana seatgipa chittini gimin sing·skaon, ua an·tangde ia chittiko nikkujani gimin mamingkoba aganna man·jawa ine Chief Minister aganchakaha.
HNLC-ni gitcham dilgipako so·otanio jak donggipa police officer-rangko kam dontongatna man·jaengani gimin ia inquiry-ko CBI-na pakwatskachina gita chittio dabiatahachim.
A·dokni DGP R Chandranathan, chutti re·angna sienga aro uni chuttina bi·aniko sorkari da·o niengkua ineba Chief Minister parakataha.