TURA: Budbar pringo, Tura-ni Mondol Tilla gittimo kamko ka·enggipa mande saksa, a·a rurongdapa man·enba siangna gita nangaha.
Koborko on·ani gitade, Budbar pringo adasa sakgni, Mondol Tilla gittimo donggipa mande saksani nok sambao a·a cho·engachim indiba pring 10:30 bajimango uamangni kam ka·enggipa biap kosakoni a·arang rang·san uamangko rurongdapaha.
A·a be·dapanio adasa sakgnioni jonggipade rasong gnange jokaha indiba adagipakode manggittang a·a be·dapaha.
A·sel ong·ani ja·mano jolni manderangsa a·ako cho·e ia mandeni manggisiko ra·ongkatna man·aha.
Koborko on·ani gitade, a·a be·dape sianggipa mandeara Mindikgre songni Maman M Sangma minggipa ong·achim aro ua da·o Tura-ni Sampalgre jolon songdongengahachim.