SWGH a·jao St Anne’s skul nok gitalko a·dokni CM nokdonggae on·anga

TURA: Bristibar salo, Meghalaya a·dokni Chief Minister Conrad K Sangma, South West Garo Hills a·jani Garagre songo donggipa St Anne’s skulni gita nokko nokdonggae on·angaha aro ia skul nokko nokdonggae on·angani somoio Tura-ni Bishop Rt Rev Andrew R Marak, Auxiliary Bishop CJ Jose, skulni skigiparang aro gipin dilgiparangba dongpae bak ra·angaha.
Ia gital skul nokko nokdonggae on·angani somoio a·dokni Chief Minister, jinmana aganprakangengon, a·doko lekka porani gadangko tang·doatanian MDA sorkarini mongsonggipa daito ong·a ine parakangaha.
Lekka porako namdapatna gita kam ka·anio dingtang dingtang neng·nikanirangko chagrongna nangengoba a·dok sorkari, skul nokrangko rike on·na aro skie on·ani dingtang dingtang cholrangko namdapatna jotton ka·enga ineba Sangma aganaha.
A·dokni pilak biaprangon lekka porako nambate on·na man·na gita sorkari dingtangmancha program-rangko ra·gate on·aha ineba Chief Minister parakataha.
Lekka porani gadangko bakande dingtangatna man·jawa ine janapatengon, iani giminsa sorkari dingtang dingtang cholrangko jako ra·e kamko ka·enga ine Sangma aganaha.
Garo Hills aro Bangladesh a·songni simarango donggipa skulrangna sorkari, solar light aro computer-rangko on·gen ineba Chief Minister, ia tom·anio jinmana parakataha.
Ia tom·anio Tura-ni Bishop Rt Rev Andrew R Marak-ba jinmana aganprakengon, songsalni namroro silroroanina lekka porako nangchongmota aro missionary-rang, Garo Hills-ni pilak kona noksikrangonaba lekka porako gipatna kam ka·enga ine parakataha.
St Anne’s skulko chalaienggipa manderangni parakatani gitade, ia gital skul nokko rikna gita dingtang dingtang dolrang ka·sae on·giltokaha aro iana dingtangmancha Germany a·songni chadamberangba Krismas carol-rangko ring·e tangka paisarangko gilchimongahachim.